FIFi: Santissimi Vito, Modesto e Crescenzia, che remitur! A Fiume e in t’e la Region Litoraneo Montana, se respira una aria de progresso, un caldo sufio de benessere che score tra le piume. El futuro ne soride!
RIRI: Me fa piazer sentir che ti xe otimista. De solito ti xe cussì musona e imbilada per come che va le robe a ‘sto mondo, che no’ ti fa che brontolar e mi, co’ te scolto, no’ facio che pensar che due coli su sto corpo de aquila xe un poco tropi e che forse uno, el tuo, lo podessimo usar per far un bel brodo.
FIFI: La parola d’ordine xe progresso!
RIRI: N’demo ‘vanti che el mondo no’ speta!
FIFI: Finalmente, finalmente, xe ‘sta presentado el progeto de el novo stadio de Cantrida!
RIRI: Go visto, el stadio, coverto, moderno…ma tuto quel atorno che me lassa come imatunida. No’ ti ga visto? I ga in pian de costruighe vicin al stadio tre gratacei de trentacinque piani, 116 metri de alteza!
FIFI: E ‘no ti xe contenta? Come dir, una bela colada de zimento che ne sepelirà tuti quanti!
RIRI: Ti ga ragion, ‘no ghe gavevo pensado. ‘Ssai comodo! I veci che vive a Cantrida sempre che i brontola che el cimitero ghe xe lontan e che i se stanca cior due coriere de fila, adesso li avicinemo al futuro. E po’ sempre che i brontola e che a Cantrida ghe xe poche panchine e che i se anoia perché ‘no ghe xe cantieri ne le vicinanze e lori no’ sa cossa far tuto el giorno! Adesso no’ ghe ocorerà andar più gnanca a Cosala. Pensa che risparmio! Ghe penserà el zimento a risolver un mucio de problemi. Una bela colada de zimento che te impacheta co’ ti te ne sta distirado, là sui gerini, sul tuo sugamaneto, a ciapar un bich de sol, eco che i te covezi co’ el zimento. Ti te ritrovi pronto e impachetado per la eternità!
FIFI: E ben, el mulo sindaco de Fiume, el Marko Filipovic, tuto contento che oltre el stadio i costruissi un albergo, che ghe podessi anche star, ma sopratuto el xe contento per i gratacei de 35 piani! El ga deto che i gratacei fa parte de una bela tradizion fiumana e che i gratacei xe el simbolo de Fiume!
RIRI: Vara ciò, e mi che ero convinta che noi due fossimo el simbolo de Fiume!
FIFI : Bisogna esser contemporanei. El Marko, al pensier dei gratacei che dominerà el mar e ghe impedirà a tuti i abitanti de Cantrida e Zamet de ‘sdociar el mar, el se ga comoso e el se ga messo pianger come un videl ricordando che lui xe de Cantrida e che a Cantrida el ghe vol ‘ssai ben. El ga promesso che no’ se tocherà el mar e le spiage, che tuto sarà identico come prima, che insoma se poderà ancora caminar lungo el mar senza che te fermi le guardie armate che te controlerà le scarsele col scanner, ma gnanca che per far un giro fin el cantier “3 magio” per provar capir dove che una volta se trovava el storico bagno dei fiumani, el Bagno Riviera, no’ te tocarà pagar el biglieto de entrata più sovratassa per uso obligatorio de sedia sdraio e ombrelon, consumazion obligatoria a parte.
RIRI: El ga promesso che el bareto Morski prasac ‘no se toca e gnanche el Portic…insoma indove che lui ghe piase vegnir bever le birete.
FIFI: E ‘no solo a lui. Ma el verde? El ga promesso che spiage e el verde no’ se toca…ma mi vedendo el progeto in 3D go ‘sdociado certe spiage compresse e imiseride e verde, dirio ‘ssai poco. Verde per modo de dir.
RIRI. E cossa ne vol ‘sto verde, che molti xe alergici al verde. „Meno verde, meno stranudi!“ Questo xe el moto anche del Ministro del mar, Butković, che xe originario de Novi Vinodolski. Anche lui a Novi Vinodolski el ghe vol un ben de la anima, tanto che a Novi Vinodolski el ga permesso che se spiani el spianabile che se zimenti tuto el zimentabile. Anche i pessi i granzipori e le naridole a Novi Vinodolski, pareria che, per el ben che el ministro ghe vol a la sua cità nadal, i li gabi tuti coverti con zimento, per far pandant col resto del paesagio. El stile el design moderno vol el color unico dominante e el grigio xe neutral e el va con tuto.
FIFI: Vara adesso, co’ ti parli de ‘sti profondi amori per el teritorio, ti me fa venignir in amente altri gesti de sincero afeto de i politici per la propia tera. Pensa per esempio al grande amor de el ex ministro per el turismo Cappelli per la sua bela Lussinpiccolo e la Baia de Cigale…ah Cigale! In ‘sti ultimi ani la xe diventada un fior, de plastica. Grote spianade e zimentade, ecomostri ciamadi alberghi de massa, ingressi ai bagni publici che par pompe de benzina…pareria che ormai le robe le sia cussì cambiade, che quel che a Cigale no’ xe fato de zimento se gabi scominzia vergognar, e pareria adiritura che i pini se senti discriminadi perché lori xe fati de legno di pin e el resto del paesagio ghe sta facendo un tremendo body shaming. Sora de tuti a burlarli xe i lampioni in plastica, quei fatti a forma de papaveri, e pareria che i poveri pini, ormai in minoranza, ga domandado de esser anche lori zimentadi, almeno in parte, per no’ ris’ciar de guastar co’ la proia naturalezza, la armonia del teritorio. I ga creado el movimento: „Anche noi volemo esser fati de zimento, cossa ‘semo noi peso de i altri? Zimentene se gavè un poco de cor!“
RIRI: Poveri pini de Cigale! Zimentemoli anche lori, demo un contributo a ingrandir la Beleza artificial!
FIFI: Ma tornemo ai gratacei de Fiume, simbolo de moderità e, come che diria quei che parla in cichera „opulenza“…sicuramente i novi gratacei de Cantrida sarà un investimento sicuro, vara come che gavemo profitado del gratacel del WTC…grande interesse de meso mondo per comprar ufici e apartmenti, tanto grande interesse che el xe rimasto la svodo e bisognerà smontarlo.
RIRI: I gratacei de Fiume, simbolo de modernità, opulenza, progresso e igiene…tanto moderni che quei costruidi costruidi ne i ani ’70-’80, i ris’ciava de romperse in tochi e de cascarghe adoso a la gente.
FIFI: E po’ ti ga ricordado la igiene. Infati in quei bei gratacei de Rastocine, che me vien i brividi solo a guardarli, , ghe xe entradi i zimisi che camina sora e soto, soto e sora per i vari piani e quartieri. E chissà se i ga risolto el problema perché certi quartieri rimasti svodi che xe proprietà de el Stato, i ufici de igiene locali no’ i li voleva disinfetar perché no’ era competenza de le autorità locali e quei del Governo a risponder che lori no’ ghe entra le questioni che riguarderia l’aministrazion locale. Insoma, un tira e mola che i unici a goder de sta situazion iera e, credo xe ancora, i zimisi.
RIRI: Fifi mia, gavevimo scominziado cussì ben, con alegria, e po’ denovo caschemo in ‘te la depresion e nel pessimismo nero. No’ stemo esser sempre cussì, disfatiste e anacroniste. Guardemo al futuro con un bich de otimismo. Butemola in valzer che la musica aiuta e provemo portarse avanti co’ i lavori. Insegnemoghe ai futuri abitanti dei novi gratacei de Cantrida una canzon tradizional de le nostre contrade che ghe vegnerà sicuro ben ne i momenti de pansion. Speta, come la andava:
Fifi e Riri scatara un poco, le se sc’arisse la vose e po’ le taca cantar:
FIFi e RIRI: (cantando in coro) „E anche ste mulete, tute mate per capel/ le zerca de compagnarse a qualche bel putel/ ma co’ le riva a casa, se senti un gran bordel/ e pare e mare e fia copa zimisi col martel! E come la bora che viene e che va, i dise che el mondo se ga ribaltà/ e come la bora che viene e che va …i dise che el mondooo, se ga ribaltaaaà!“
RIRI: Jesus i Maria!
