FIFi: Santissimi Vito, Modesto e Crescenzia, no’ so se rider o pianser!
RIRI: Cossa nasse, testa de usel?
FIFI: Cossa no’ nasse! El elenco saria lungo. Le robe che sucede nel mondo me fa vegnir certi brividi! Guardar da qua su, restando incolade su la Tore civica e no’ poder far gnente, me mete ‘dosso una ansia che no’ te digo.
RIRI: E mi te rispondo: a remengo la politica e tuti i politici de ‘sto mondo! Tuti quei che in nome de conceti che me xe diventadi odiosi, Stato, Nazion, i fa scopiar guere, i bombarda ospedai e case, loghi de culto e teatri, i risponde a la violenza co’ ancora pergior violenza e metendoghe in meso solo e solo che la popolazion zivil, fioi, done, veci e maladi. Me vien, co’ ghe penso, un senso come de sofigo. E no’ voio nominar aposta né una guera, né una altra guera, né una nazion o una altra nazion, né quei popoli a cui no’ ghe se riconossi el dirito de gaver una propia nazion. La passion, la soferenza xe una e unica, e indove che esisti la soferenza no’ ghe xe altro che ingiustizia e disumanità.
FIFI: A remengo, a remengo!
RIRI: Ti sa cossa, lassemo star ‘sti discorsi che te voio contar una bela roba. Ti sa che semo stade nominade durante un seminario de agiornamento per i insegnanti de le scole italiane de la CNI che se ga tegnudo a inizio dicembre in Abazia? Lo ga organizado el setor Scola de la Unione Italiana co’ a capo la Patriza Pitacco.
FIFI: Figo!
RIRI: Tema de el seminario era: come riconosser e svilupar el talento.
FIFI: Bel, proprio bel. Ma dime, tra i relatori xe ‘sta invitado a parlar anche el capo del Governo croato, el Plenki Plenković?
RIRI: No.
FIFI: E perché no? Ghe se gavessi dovudo pensar e invitarlo a tegnir una bela “Lectio Magistralis” sul Tema:”El mio talento per riconosser i colaboratori fidadi e i ministri”.
RIRI: Ti ga ragion! Chi più de lui ga dimostrado in ‘sti ani de gaver talento per seglierse i ministri e consiglieri, i vari direttori de ditte importanti per el funzionamento de ‘sto benedeto Stato come per esempio la HEP?
FIFI: Sempre che el seglie zente incorutibile, fidada e discreta che no’ ghe vegnerà inamente de aprofitar de la posizion per arafar soldi, costruir case abusive o spiferarghe ai aversari politici cossa che se prepara in sede de Governo e in ‘tela Acca Di Zeta.
RIRI: El Plenki ga per vero un talento natural per seglierse i colaboratori.
FIFI: E infati, ghe piase cussì tanto seglierli ‘sti ministri e consiglieri, che li cambia come le mudande. Le ultime mudande che ghe se ga roto el lastico e le va cambiade, xe el Ministro de la ecomonia Filipović e el consiglier special Lovrićević che invece che consigliar ghe faceva la spia a quei del partito del Most.
RIRI: La altra matina co’ el bareto qua sul Corso ga impizà la radio per sentir le notizie, te giuro che me ga ciapado la ridariola. S’ciack s’ciack, me pareva de sentir i lastichi de le mudande che s’ciopa.
FIFI: Ma te par possibile? Solo che in Croazia pol suceder ‘ste robe e nissun che ghe ciapi la ridariola, che no’ i vedi el ridicolo de la roba.
RIRI: E cossa ti vol, el croato xe fato cussì. Ghe piasi de regola star cuzo, no’ protestar e, per carità de Dio, no’ far mai ironia su gnente.
FIFI: Ma dai, no’ ti senti che aria de modernità che se respira in tuta la Region?
RIRI: Cossa ti intendi per Region?
FIFI: Xe quel termine neutro che spuza un bich de ipocrisia, che se usa ultimamente per definir el teritorio che va su, su, a partir de la Slovenia e po’ zo, zo, fin la Macedonia del Nord, e po’ ancora in tondo, in tondo, de la Croazia, de la Bosnia e fin’ sora, sora, ai confini orientali de la Serbia. Region: termine che tradoto in un linguagio un bich meno ipocritese, saria come dir la Ex Jugoslavia, la ex Federazion de Stati, la Defonta…
RIRI: Ma no’ la Defonta, Defonta…
FIFI: …ma la Defonta de dopo de la Defonta.
RIRI: Go capì, la Defonta ex Jugoslavia, sempre viva nel cor de tanti…
FIFI: A Fiume ti troverà più nostalgici de altri regimi e de altre storie, magari sì, anche nostalgici de la ex Defonta Jugoslavia, fra de lori ghe xe sopratuto quei rivadi a Fiume dopo el ’45.
RIRI: Li capisso. I ga trovado case svode lassade da i esuli, lavori pronti, wintofen e acqua corente ne le cusine…
FIFI: …gabineti, lavandini e vasche da bagno ne le case, che no’ ocoreva più andar in t’el campo de granturco far i bisogni…
RIRI: Li capisso, ma mi continuo ricordar una Fiume libera, s’ceta e moderna, Città Stato acogliente, intraprendente, indove che le done godeva de la propia libertà, a diferenza de altri posti, compesa la capital de la Croazia, Zagabria, indove che, prima de la seconda guera mondial, le done no’ podeva andar fora de casa se no’ acompagnade da un omo.
FIFI: A Fiume invece, nei secoli passadi, le done le decideva per sé, le gaveva un lavor, le faceva sport.
RIRI: Le done sposade gaveva un metodo sicuro per meter a posto quei mariti che el giorno de paga, invece de vegnir a casa, i se fermava in osteria a bever e a spender tuto el stipendio.
FIFI: ‘Sta storia, me ricordo, ghe la contava anche la Rosi Gasparini a le giovani giornaliste de “La Voce” perché le impari a farse rispetar da i omini.
RIRI: El metodo de le fiumane de una volta era infalibile: co’ el marito el rivava a casa imbriago duro, el se butava sul pajon, el se indormenzava de boto e el tacava ronchisar. La moglie, a ‘sto punto, la ciapava un baston e la lo crozolava per ben. Lui era cussì imbriago, che no’ el se inacorgeva de gnente e el continuava pacifico a dormir, giusto giusto el se girava de la altra parte per poder ciapar ancora qualche crozolada. El giorno dopo, co’ el se sveiava, anche se no’ el se ricordava gnente, el se sentiva de gaver un gran mal de ossi. Dopo un per de mesi de ‘sto tratamento: lui che torna imbriago e el se buta sul pajon a ronchisar, ela che puntualmente lo crozola e lui che co’ el se sveia ghe fa mal tuti i ossi, el concludeva che saria sta’ meio smeter de frequentar le osterie perché bever no’ ghe faceva per gnente ben a la salute, specialmente no’ ai ossi.
FIFI: Tuta ‘sta storia per dir?
RIRI: Che in ‘sti tempi iper moderni in cui se parla de contaminazion tra omo e machina, tecnologia biometrica e riconoscimento facial, de machine che penserà e creerà per noi…
FIFI: …de zervei che a forza de far pensar le machine per noi i finirà per strenserse come spigole…
RIRI: Le done moderne doveria tegnir inamente la lezion de le nostre vece done fiumane.
FIFI: Che saria?
RIRI: No’ digo de crozolar i mariti. Xe meio che mai nissun ghe meti le man sora de qualche d’un altro, ma de esser più decise a farse rispetar. Mi me par che, dai e dai, zerti diriti che ne pareva acquisidi, i ‘sta andando pian pian a farse friser. Ma ti ga mai sentido che a Fiume le done vegniva pagade meno de i omini, e questo sia ai tempi de i tempi, che al tempo de la famosa Defonta ex Jugoslavia?
FIFI: Sinceramente no. Nissun ghe saria vegnudo inamente che una dona, solo per el fato de esser dona, la devi esser pagada meno de un omo.
RIRI: E invece adesso che semo in democrazia, le robe le xe cambiade, ma ‘ssai in peso. Pareria che ‘sta abitudine de pagar meno le done in Europa e in Croazia la sia normal. El 15 novembre 2023 se ga festegiado el cosideto EU Equal Pay Day (Giornata europea per la equiparazion de i stipendi tra mas’ci e femine) e durante una tribuna che ga organizado la Region Litoraneo Montana che se ga tegnù al Ateneo de Fiume, su a Tersato, xe vegnù fora che in media in Europa le done guadagna 100 Euro meno che i omini e che in Croazia queste le vien pagade da ‘l 11 al 15 per cento in meno che i omini. No’ se tien conto de el fato che le done le tien i famosi cantoni de la casa, che ghe toca sgobazar fori e po’ anca co’ le torna a casa.
FIFI: In genere, tuto quel che el socialismo gaveva portado de bon, e qualcossa pur ghe iera, vedi certi diriti acquisidi fondamentali che saria po’ el dirito a la salute, al studio e al lavoro, la democrazia li ga spazetà in do e do quatro. I ga ciolto el peso de i modei de la cussì deta democrazia ocidental e i diriti aquisidi xe andadi farse friser in un amen.
RIRI: A mi, sinceramente, in tuta sta girandola de modernità e de ipertecnologia, me par che per zerte robe, zerti costumi che cambia, stemo ripiombando nel Medio Evo.
FIFI: Ja, ti ga propio ragion.
RIRI: A proposito de costumi, me vien inamente ‘sta nova storia de i costumi da bagno e de le nove regole de comportamento che doveremo adotar ne le spiage in Liburnia (Kostrena, Fiume) e ne la ultra liberal e evoluda Istria, a Pola. De ‘sto ano in avanti sarà proibido el topless.
FIFI: Gnente più zize al vento, ma gnanca più nudismo, o squasi.
RIRI: Ma, se trenta, ma anche quaranta ani fa no’ ti vedevi in giro per le spiage de la Istria e del Quarnero altro che zize e culi e nissun se scomponeva, anzi, tuti che diseva: ‘Ah che bel, el corpo finalmente ga smesso de rapresentar un tabù! Nissun più ghe badi che anzi, ne par finalmente che se gavemo liberado de i sterotipi, de i moralismi, anacronistici’…e ča ti ja znan.
RIRI: Le feministe, a suo tempo, protestava brusando i regipeti in piaza come segno de liberzion da la schiavitù de le regole che limita la possibilità de le done de esprimerse, anche atraverso la propia sesualità.
FIFI: … e noi ‘desso, in prevision de la nova stagion estiva 2024, abolimo el topless, limitemo al massimo le spiage indove che se poderà far i nudisti e po’ ancha tachemo detar regole de comportamento per tuti quei che vol andar in spiagia.
RIRI: A Pola i ga decretado, e tuti, son sicura, andarà tra un poco drio de lori, che xe vietà portarse drio le fiaschete de alcol su la spiagia. Le s’cinche se le va cior drito drito due metri più in su, nel bareto che sta vicin la spiagia.
FIFI: Bon dai, ghe pol anche star. Meno botigliete de alcol, meno ris’cio de trovarse tochi de vetro sui gerini e meno ris’cio de taiarse un pie’.
RIRI: Ma ‘sta storia del topless a mi no’ me va zo in nissun modo. Me par tanto che in ‘sta roba se ga missiado zerte corenti politiche reazionarie…
FIFI: …e zerte corenti religiose…
RIRI: …che vol per forza detar lege in t’el mondo laico.
FIFI: Volemo parlar dei sburtoni de el catto-moralismo che ne sta tuti quanti zucando indrio invece che andar avanti?
RIRI: No’ stemo far questioni de una sola religion, che no’ xe bel.
FIFI: No’ xe bel, ti ga ragion. Cioghemo più religioni e più abitudini che imponi limitazioni varie, in particolar a le done. Magari potemo far nostre anche le bele abitudini de zerti d’uni, chissà! No’ stemo meter limiti a la Providenza.
RIRI: Mi gavessi de farghe una proposta a le varie autorità municipali e regionali, in particolar a quele de Pola, Costrena, Fiume, e tuti quei che se ricorderà de s’gnacarne qualche bela regola per far rispetar el novo senso de el pudor e de la moral. Propongo de introdur un costume de bagno locale che ogni comunità poderà adotar zontandoghe magari i colori de la bandiera locale, e se ghe parerà el caso, i poderà farlo anche diventar parte del folklor e po’ partecipar al concorso de el Mistero a la cultura per inserirlo in t’el elenco dei beni imateriali. A Fiume se podessi obilgar le done a meter un costume de bagno rigorosamete de color azuro, oro e amaranto, con tanto de aquila bicipite, (anche questa rapresentada in regipeto). El costume se podessi ciamar „Fiumanini“. A Pola vegniria disposto dal Comun el obigo per le done, de meterse indoso, per far una tociada, el „Polesini“, rigorosamente de color verde co’ una crose giala e magari la zonta de una cavra in rilevo. Anche la cavra doveria gaver le ghiandole tipiche dei mammiferi coverte con una straza o un qualcossa che somiglia a un regipeto. Per le signore che andarà far bagno a Costrena se adoterà el „Costrenini“. El sarà del color de el stema de Costrena, un celeste ciaro con in campo una caravela giala e una vela rossa che svola.
RIRI: Bela ‘sta idea dei stemi e de le bandiere sui costumi. Ma che forma gaverà ‘sto costume per le bagnanti del ventesimo decenio del Ventunesimo secolo?
FIFI. El saria prima de tuto comodo comodo, che ghe possi star la panza più piata come quela più granda, le zizze pice, come quele enormi, i culoni, come i culeti. Tanto importerà poco perché grazie al costume no’ se vederà più gnente.
RIRI: Zerte done diria: ‘un bel vantagio, no’ ‘corerà meterse in primavera a far quele noiose diete „per la prova costume“ o spender soldi per tratamenti contro la celulite.
FIFI: No’ infati, tute uguali, imbacucade ne i „Fiumanini“ „Poliesini“ e „Costrenini“. Resterà bel pulito fori i oci e el aluce del piede destro. Per quele che xe zanchine, xe previsto un buso per meter fora el aluce sinistro.
RIRI: El aluce regolarmente no’ deve esser lacado, per no’ farghe vegnir strane idee ai omini de pasagio.
FIFI: Ti sa però come che dise i regnicoli? “Fatta la legge, trovato l’inganno”? E alora se gavemo un poco sforzado el zerveleto e ne xe vegnuda una ideona: ‘sti bei „Fiumanini“ „Polesini“ e „Costrenini“ se li podarà usar anche per contravenir a le regole de el ordine costituido. Viste le forme larghe dei costumi ghe sarà tante de lore che aprofiterà per contrabandar in spiagia le pljoske (le fiaschete piate) co’ drento la slivoviza e el pelinkovac. Le scondarà le pljoske bel pulito drento i costumi de bagno. Nissun se inacorgerà de gnente, ma drio i costumi le signore, co’ le andarà al bagno, no’ le farà che ciuciar e ciuciar, un sluck dopo ‘l altro. E se per via de i „Fiumanini“ „Polesini“ e i„Costrenini“ no’ se podarà più veder gnanche la ombra de una zizza, in compenso podaremo amirar certi oci lucidi che brilerà in meso a quei costumi gnanca che saria stele cadenti che ilumina el ciel ne le calde noti de Feragosto.
RIRI: Jesus i Maria!
