FIFI: Santissimi Vito, Modesto e Crescenzia, che remitur! Ma bel! Vara quante luci per el Corso. Che poesia! El albero de davanti al Munizipio tuto adobà!
RIRI: E che odor de fritole!
FIFI: Xe arivà Nadal. Che bel, che bel!
RIRI: Che ne ga portà regali e elezioni presidenziali.
FIFI: Con poche sorprese.
RIRI: Me vien de cantar quela canzon che cantava Giorgio Gaber…
FIFI: Cos’è la destra? Cos’è la sinistra?
(FIFI & RIRI le se mete cantar):
RIRI: La pungia bionda e el taierin, ma anche la maieta a scachi rossi e bianchi portada co’ xe le partide de la Nazional, xe de destra.
FIFI: El sacheto blu e la camisa bianca co’ o senza cravata, xe de sinistra.
RIRI: Cantar e esser patetici, spudar un poco su Fiume e esaltar le zità che vota HDZ, xe de destra.
FIFI: Esser boriosi e senza un programa, xe de sinistra.
RIRI: Gaver come programa eletoral el moto “I dise che noi no’ podemo, ma invece podemo, (ma cossa?), xe de destra.
FIFI: Dir, per incoragiar i eletori, che un Stato lasado in balia del caso xe un Stato nato per caso, xe de sinistra.
RIRI: Zigar “Luka Modić xe come mio fio, e in giro ghe ne xe tanti come lui che poderia esser come lui mii fioi, tanti pici Luka!” Xe de destra.
FIFI: E urlar: “Mi co’ iero al governo nel 2015 go sbassa’ el PIL e ghe go dovù per forza alora cavarghe i diriti ai lavoratori!”. Xe de sinistra…
RIRI: Fermite, per carità, che me gira la testa. Destra, sinistra, sinistra, destra. No’ capisso gnente e no’ li distinguo per gnente. Ma dove xe ‘sta sinistra e dove xe ‘sta destra? Me sa che ormai ‘ste divisioni xe robe vece che nissun se ricorda gnanca come che le xe nate e perché.
FIFI: Ma basta Riri mia, xe Nadal, tra qualche giorno sarà Capodano, mi no’ go proprio voia de parlar de politica, almeno no’ de ‘sta politica che i ne serve, de programi che no’ xe programi, de partiti che i xe istesso tempo passatisti e progressisti e tradizionalisti e futuristi…Mi go voia de parlar de robe alegre, de pensar a le oresgnaze e al bacalà in bianco, a quele bele fritole che le se frise su le bancarele de el Corso. Go voia de star un poco in pace guardar la zente che passegia, i fioi che se ralegra!
RIRI: Ma pensemo anche a quei poveri fioi de quel posto in Lika che se ciama Glina, fioi che xe de famiglie povere, e che una associazion umanitaria ghe gaveva comprà giogatoli, ciocolate e bomboni per Nadal. Ma qualchedun la altra note, che ghe vegnissi un granfo sul pie sinistro e anche su quel destro, ga pensà ben de entrar in tel magazin indove che i se tegniva i regali per i fiori, e de rubarli!
FIFI: Triste assai. Ma xe za i volontari che se ga messo a l’opera e i ga ingrumado i regali de portarghe a ‘sti fantolini. Ghe auguremo noi Bon Nadal a ‘sti fioi, e tanta fortuna!
RIRI: El 2019 ne ga portà un bich de tuto, un bich de salute e un bich de malatie, un bich de miseria e tropo poca richezza, un bich de scioperi e proteste e un bich de sucesi che te fa capir che a star sempre cuzzi e boni se fa mal, che gavendo coragio, dai e dai, ogni tanto ti la spunti.
RIRI: Forse che ‘sto altro ano el ne porterà anche un bich più de senso de el umorismo, de voia de rider no’ solo de i altri, ma anche de noi stessi.
FIFI: Speremo, spetando ‘sto famoso ano de la cultura, che a Fiume ghe porti veramente più cultura, meno politica e tanta economia alargada.
RIRI: Nel senso che dovessimo provar a crear una rede de contati. Che tuti dovessimo zercar de colaborar per migliorar la situazion economica a Fiume e in Region. No’ pensar in picio, ma pensar in grande, tuti per tuti e no ogni d’un per conto propio.
FIFI: Ma che bei pensieri de fine ano! Sento che semo cussì dolzi e zucherose, che a chi ne lege ghe ga za ‘scominzià a cariarse un dente.
RIRI: Alora disemo, che ‘sto 2019 el passi e che el se porti via con sé tuto el bruto e che el Ano Novo el ne porti veramente qualcossa de bel!
FIFI: Riri, ma perché anche noi che seguimo e comentemo tuto, non poderiimo far come che fa quela famosa rivista americana, TIME? Perché anche noi no’ demo el nostro bel riconosimento per la personalità de el ano?
RIRI: Giusto! Se el TIME, el ga eleto la picia 16enne ativista per el clima Greta Thumberg, personalità de el ano, mi e ti dovessimo sceglier qualchedun che secondo noi ne rapresenta per spirito e senso de la libertà.
Fifi e Riri taca ciacolar fra de lore e se sente solo come un “Cicici, cicici”. Ma dopo un poco, a consultazioni avenude, eco che le vien fora con la propia nomina:
FIFI: Hmm, hmm (la se s’ciarisse la vose). Mi e la Riri, e i redatori de “La scartaza”, dopo lunghe consultazioni, gavemo deciso de asegnarghe el premio come personalità del ano a…
RIRI: A la Tombolera anonima de el Circolo!
FIFI: Yeee! Motivazion: la signora Tombolera che ga voludo restar anonima, la xe la unica personalità de questa parte de la Europa, ciamemola Europa Meridional, che la ga deciso de dirghe ‘Ande farve benedir!’ a tuta la Union Europea che xe ani che la rompe e la ghe impone ai Stati meridionali de la Union, i modei de seguir ne la economia, ne i modi de viver, de magnar, de comportarse. I impone i modei de la “Europa de là su”, de indove che i sta lori. E al Portogalo che gaveva tuta la economia de la pesca basada su la pesca de el bacalao, i ghe gaveva deto de bon principio: ‘No’ ste pescar el bacalao che lo peschemo noi de la su!’ E a quei che per tradizion i ga sempre fato la ciocolata solo e che solo col buro de cacao i ghe ga deto: ‘Ma cossa che no’ serve, se pol far la ciocolata anche co’ el oio!’ E regole de qua e regole de là che poco ga de far con le tradizioni e le abitudini de zerti Paesi. Fino un certo punto la signora Tombolera la ga deto, ‘Bon, me adato, cossa devo far, e continuo giogar la Tombola in Circolo. Ma ‘sto ano ghe xe sta la joza che ga fato trabocar el vaso e sta precisa joza la ga fato el patatrac quando che la Union Europea ne ga imposto a noi Paesi meridionali che de sempre sughemo le straze su le tiramole, le impichemo sui balconi, sul fili tacadi tra due pali in tei orti de Scoieto, Cosala, Toreta e Cantrida, che no’, le straze no’ se deve più sugar su el sol al aperto, ma le dovemo sugar solo che drento in casa!
RIRI: A ‘sto punto la Signora Tombolera la ga comentà: ‘Ma in casa le straze le ciapa odor de freschin!’ La xe veramente s’ciopiada e la ga molado un urlo come quel che mola la Xena pricipessa gueriera, e la ga deto, alzando el secio co’ i ciapini come se saria una qualche arma de guera: ‘Nissun me impedirà mai de meter sugar sul sol le mie straze del marchese! E dopo la ga urlà de novo come che urla la Xena principessa guerriera.
FIFI: Disobedienza civil!
RIRI: Violazion de una lege internazional!
FIFI: ‘Lege ingiusta!’ Ga urlado a ‘sto punto un giovane che fino in quel momento el protestava per i fati propi, co’ la maschera co ‘ i bafeti de Guy Fawkes, quela famosa de V for Vendetta. E subito el xe andà scriver su la sua pagina de Istagram ‘Sostegnimo la vecia Tombolera nel suo dirito de impicar su la tiramola le straze de el marchese!?
RIRI: ‘Sto apel xe diventà viral prima de dir Amen, e le maschere de V for Vendetta se ga cambià in un bati balen co’ le maschere de la Tombolera anonima e col moto “Liberà straza de el marchese in libera Union Europea!”
FIFI: Fin qua tuto ben. Già el movimento se stava fazendo sentir e se scominziava a organizar dei “sit in” de protesta in giro per le varie zita de e la Europa Meridional, da le Baleari, al Tireno, da el Ionio, al Adriatico, da el Egeo al Mar de Creta.
RIRI: Quando che uno dei muli che cura la pagina Istagram de el Movimento “Libera straza de el marchese in libera Union Europea!” El ga deto: ’Speta un poco! ‘Sti social funziona solo se ghe xe la foto!’
FIFI: ‘Dove xe la foto de le straze de el marchese de la vecia Tombolera anonima?’ Ga domandà el mulo.
RIRI: Apriti cielo! Dove le xe, dove no’ le xe? La vecia Tombolera ga molado un urlo tipo quel de la Xena principessa guerriera, ma sta volta no’ come urlo de guera…
FIFI: …ma come per dir ‘Jesus i Maria! Ma dove le go messe che xe un poco de tempo che no le tiro fora de el armeron, perché, guarda el caso, co’ se dise el caso, xe un poco de tempo che no’ me capita de doperarle ‘ste straze de el marchese!’
FIFI: Povera! No’ la se podeva priopio ricordar indove che la le gaveva messe ste benedete straze…
RIRI: …e el putel che la gaveva eleta a simbolo de la protesta per le Le straze del marchese libere, el insisteva che la se movi a zucarle fora che i se devi tuti fotografar co’ le straze e i devi filmar i video per el novo canal you tube e che bisogneria impicar ‘ste straze sora le tiramole co’ se fa le grandi manifestazioni de piaza che devi vegnir le televisioni a filmar…
FIFI: E la povera Tombolera a zercar le straze per i armeroni: ‘…e una volta le tegnivo là, ma dopo gavemo cambiado armeron, e po’ le tegnivo de là, ma gavemo dovù lacar i scabelini per via de i tarli e flitar per via de le tarme e le gavevo spostade’. E ela avanti che la zerca e la te zerca.
RIRI: Cossa far, cossa no’ far? De colpo, a la Tombolera ghe vien una idea…’Ecco indove che le xe finide, maledeta ora!
FIFI: Come che xe sta, come che no’ xe sta, le straze de el marchese de la nostra eroina, le xe finide a un zerto punto in Egito e là i le ga doperade per involtizar una mumia e ‘sta stessa mumia, dopo un zerto tempo, la xe finida, no’ se sa come e no’ se sa quando, in tel famoso museo Egizio de Torino, che i dise che el xe uno dei più grandi musei egizi de el mondo.
RIRI: Dir che ghe ga scominzià a tremar i zinoci, xe dir poco. Povera, la bateva i denti de la dentiera a uno a uno! Cossa far, cossa no’ far?
FIFI: Idea! La se ga ricordà! A Torino ghe xe una grande comunità de fiumani, istriani e dalmati che ga un bel Circolo indove che i fa tanta atività e i se ritrova sempre per star in compagnia. Eco che la ghe ga telefonà al Andor Brakus.
RIRI: ‘Andor’ la ghe ga deto sufiandose el naso, ‘me servissi quele straze, le me servi proprio. Te prego, ti che ti ga sempre qualche idea, fa qualcossa!’
FIFI: Come dirghe de no? Andor, se ga comoso sentirla come che la se sufia el naso oltre el telefono e, aprofitando de el fato che el ga proprio el fisico giusto per sgataiolar inoservado de note in tei musei, el xe rivà armado de pinze, el xe rivado entrar in tel Museo Egizio de Torino, svoltizar la mumia, ingrumar le straze e po’ dopo, le ga fate arivar per vie traverse, e segretissime, a la nostra Tombolera.
RIRI: E la Tombolera co’ la ga riavudo le sue straze de el marchese la ga molà un urlo come quel de la Xena principessa gueriera, ma de contenteza, ‘sta volta. La ga esclamà: ‘Ah quanti bei ricordi!’ e dopo, in barba a le Legi de la Union Europea, in barba ai dictat che no’ tien conto de le tradizioni de i popoli, in barba ai nostri governanti che sbassa la testa e che a quei sentadi in tel Parlamento su a Bruxelles i ghe dise sempre de sì’, la se ga impicà le sue straze del marchese su la sua bela tiramola oliada de fresco che la xe tirada tra la finestra de la cusina e quela de el gabineto e, svelto svelto, la ga ciolto el novo smart phone, e stando atenta che se vede, insieme co’ le straze, la nova petinatura, la colana de perle, ricordo de la vecia Tante de Viena, e slungando el brazo come che gaveria fato un folpo del Quarnero, la se ga fato un selfy che xe subito andà finir su le pagine de Istagram de el movimento “Libera straza de el marchese in libera Union Europea!”
FIFI: Jesus i Maria!
RIRI: La storia xe andà proprio cussì!
FIFI& RIRI: E adesso permetene de far tanti auguri ai veci e ai giovani; ai magri e ai grasi; ai roti de capoto e a quei meno roti de capoto; ai insempiadi e ai meno insempiadi; ai inamoradi e a quei che se ricorda che bel che era esser inamoradi; a quei che no’ ghe va de rider e a chi volessi solo che rider; a chi che se rabia per ogni monada e a chi no’ se rabia per gnente; a chi che sa andar avanti e a chi che resta tacà a un punto fisso e no ’el se movi; a chi che cambierà el mondo e a chi che ‘sto mondo lo ga za provà mile volte cambiar: Bon 2020!
11. La scartaza: Alo’ Alo’ qua parla Radio Fiume!
10. La scartaza: E chi se rabia!
9. La scartaza: Dimela cantando
8. FIFI & RIRI: El vecio xe vecio
7. FIFI & RIRI: Allarmi, siam fascisti!
6. Fifi e Riri – Odissea in tel spazio, Ano 3018
5. Fifi & Riri e el dialeto fiuman: La difesa de el panda rosso
4. FIFI e RIRI e “El vento de el cambiamento” de le elezioni UI e CI
3. Fifi e Riri e el EPK (che po’ saria tuto un problema de usei)
2. Fifi e Riri el bilinguismo e el referendum contro le aquile che ga due teste/
1. Fifi e Riri, quele due teste de aquila
